garmi ki ek dopahar, aam ke ped tale
main khaat lagakar let gaya.
kuch der tak ped ko niharta raha,
tabhi ek adha hara adha peela patta mere kandhe par aa gira.
maine usse haath mein samet liya aur usse kuch der dekhta raha.
fir apne thoda kareeb laake maine usse poocha-
abhi to tumhara waqt nahi hua, fir kyu chale aaye.
patta thoda muskara kar bola-
main bahut der se tumhe dekh raha hun,
socha mera waqt to kabhi bhi aane wala hai,
tum bahut akele ho, kuch der hi sahi, tumhe thodi company de dun.
