Kareb ek do din pehle main market mein ghoom rahi thi ki achanak meri nazar rang bheerange gubbaron par padi. Mujhe gubbarein bade pasand hai. Meri icha si hui ki ek gubbara khareed lun. Fir laga abhi rehne hi deti hun, ek ghar pe bhi to hai aur fir abhi kaun change ke jhamele mein padega. Gubbarein wala change mangega aur mere paas panch sau ka ek note hai. Aaj rehne hi deti hun. Wahan se main aage badh gayi aur wapas apni car mein baith kar ghar ko nikal gayi. Gadi mein baithe baithe mujhe 20 saal poorani ek baat yaad aayi.
Main 7-8 baras ki rahi hongi, apni badi behen ke sath market gayi thi. Meri behen mujhse 7 saalbadi hai to mujhe apni Ma si samjhane lagi thi. Mummy ne usse kuch samaan lene market bheja tha. Wo mujhe bhi sath le gayi. Uss din cycle puncture thi to hum paidal hi market gaye the. Market se samaan leke laut rahe the. Kaafi der se meri behen dekh rahi thi ki meri nazar gubbaron par hai. Saara samaan lene ke baad wo mujhe hath pakad ke gubbarein wale ke paas le gayi. Mere chehra chamak utha. Aise laga market aana safal hua. Wo gas wale gubbarein the. Waise to mujhe gulabi, peele , laal gubaarein ache lagte hai. Par uss waqt uske paas bhoore rang ke gubbarein the. Gubbarein apple ki shape ke the. Upari hissa peela tha. Maine jhat se gubara le liye, iss firaq mein ki kahi yeh baat aade na aaye ki tumhe ye rang pasand nahi hai to rehne do kabhi aur el lena.
Gubbarein leke hum kuch aage bade. Raastein mein baat karte jaa rahe the. Main gubbara paake aise khush thi ki jaise paani dekh kar registaan hota hai. Aur meri behen mujhse shayad kuch zyada khush thi. Baat karte karte hum main road ki taraf pahuch gaye. Didi ne mera hath kuch kas ke pakad liya. Aur sath yeh bhi kaha ab dhyaan se, gubbarein se ghar jaake khel lena. Maine didi ka hath pakad ke sadak cross kar rahi thi. Achanak hawa kuch tez hui aur gubbara mere hath se fisal gaya. Gas ka gubbara tha to kuch upar uda wo. Didi ne mera hath tab bhi pakde rakha par samaaan zameen pe gira diya. Kuch kudi wo, kuch bhaagi mujhe leke, par gubaara upar udta gaya. Main usse jaate dekhti rahi. Hum dono wahi ruk gaye aur upar udate gubbarein ko dekhte rahe. Main kuch mayoos thi aur mujhse zyada didi. Usne kharche ke paison mein kuch bacha ke mujhe wo dilaya tha. Fir wo kuch sambhali, aise dikhaya ki kuch nahi hua hai. Laut ke samaan uthaya, mera hath kuch zyada kas ke pakda aur aage leke jaane lagi. Main ab bhi uss gubaarein ko dekh rahi thi. Door asmaan mein wo udd raha tha. Bhoore rang ka gubaara, pata nahi ab kahan hoga.
Itne saal beet gaye. Zindagi badal gayi. Aur ek wo din tha aur ek yeh din hai. Jeb mein paise lade hote hai, market mein har shape ke gubbarein milte hai. Main gubbara nahi ab gubbarein le aati hun. Par wo bhoora gubbara aaj bhi mujhe yaad aata hai. Aaj bhi mujhe kahi mile to le lungi main wo gubbara. Aur iss baar main usse jaane nahi dungi.
No comments:
Post a Comment